Agni Sūktam (Ṛgveda)

(ऋ.वे.1.1.1)

अ॒ग्निमी॑ले पु॒रोहि॑तं-यँ॒ज्ञस्य॑ दे॒वमृ॒त्विज॑म् ।

होता॑रं रत्न॒धात॑मम् ॥ 1

अ॒ग्निः पूर्वे॑भि॒र्-ऋषि॑भि॒रीड्यो॒ नूत॑नैरु॒त ।

स दे॒वा।ण् एह व॑क्षति ॥ 2

अ॒ग्निना॑ र॒यिम॑श्नव॒त्पोष॑मे॒व दि॒वेदि॑वे ।

य॒शसं॑-वीँ॒रव॑त्तमम् ॥ 3

अग्ने॒ यं-यँ॒ज्ञम॑ध्व॒रं-विँ॒श्वतः॑ परि॒भूरसि॑ ।

स इद्दे॒वेषु॑ गच्छति ॥ 4

अ॒ग्निर्​होता॑ क॒विक्र॑तु-स्स॒त्यश्चि॒त्रश्र॑वस्तमः ।

दे॒वो दे॒वेभि॒रा ग॑मत् ॥ 5

यद॒ङ्ग दा॒शुषे॒ त्वमग्ने॑ भ॒द्र-ङ्क॑रि॒ष्यसि॑ ।

तवेत्तत्स॒त्यम॑ङ्गिरः ॥ 6

उप॑ त्वाग्ने दि॒वेदि॑वे॒ दोषा॑वस्तर्धि॒या व॒यम् ।

नमो॒ भर॑न्त॒ एम॑सि ॥ 7

राज॑न्तमध्व॒राणा॑-ङ्गो॒पामृ॒तस्य॒ दीदि॑विम् ।

वर्ध॑मानं॒ स्वे दमे॑ ॥ 8

स नः॑ पि॒तेव॑ सू॒नवे-ऽग्ने॑ सूपाय॒नो भ॑व ।

सच॑स्वा न-स्स्व॒स्तये॑ ॥ 9