Manyu Sūktam

अथ मन्युसूक्तं ऋग्वेद संहिता; मण्डलं 10; सूक्तं 83,84 यस्ते᳚ म॒न्यो-ऽवि॑धद् वज्र सायक॒ सह॒ ओजः॑ पुष्यति॒ विश्व॑मानु॒षक् । सा॒ह्याम॒ दास॒मार्य॒-न्त्वया᳚ यु॒जा सह॑स्कृतेन॒ सह॑सा॒ सह॑स्वता ॥ 1 ॥

म॒न्युरिन्द्रो᳚ म॒न्युरे॒वास॑ दे॒वो म॒न्युर् होता॒ वरु॑णो जा॒तवे᳚दाः । म॒न्युं-विँश॑ ईलते॒ मानु॑षी॒र्याः पा॒हि नो᳚ मन्यो॒ तप॑सा स॒जोषाः᳚ ॥ 2 ॥

अ॒भी᳚हि मन्यो त॒वस॒स्तवी᳚या॒-न्तप॑सा यु॒जा वि ज॑हि शत्रू᳚न् । अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्व-न्नः॑ ॥ 3 ॥

त्वं हि म᳚न्यो अ॒भिभू᳚त्योजा-स्स्वय॒म्भूर्भामो᳚ अभिमातिषा॒हः । वि॒श्वच॑र्-षणि॒-स्सहु॑रि॒-स्सहा᳚वान॒स्मास्वोजः॒ पृत॑नासु धेहि ॥ 4 ॥

अ॒भा॒ग-स्सन्नप॒ परे᳚तो अस्मि॒ तव॒ क्रत्वा᳚ तवि॒षस्य॑ प्रचेतः । त-न्त्वा᳚ मन्यो अक्र॒तुर्जि॑हीला॒हं स्वात॒नूर्ब॑ल॒देया᳚य॒ मेहि॑ ॥ 5 ॥

अ॒य-न्ते᳚ अ॒स्म्युप॒ मेह्य॒र्वाङ् प्र॑तीची॒न-स्स॑हुरे विश्वधायः । मन्यो᳚ वज्रिन्न॒भि मामा व॑वृत्स्वहना᳚व॒ दस्यू᳚न् ऋ॒त बो᳚ध्या॒पेः ॥ 6 ॥

अ॒भि प्रेहि॑ दक्षिण॒तो भ॑वा॒ मे-ऽधा᳚ वृ॒त्राणि॑ जङ्घनाव॒ भूरि॑ । जु॒होमि॑ ते ध॒रुण॒-म्मध्वो॒ अग्र॑मुभा उ॑पां॒शु प्र॑थ॒मा पि॑बाव ॥ 7 ॥

त्वया᳚ मन्यो स॒रथ॑मारु॒जन्तो॒ हर्​ष॑माणासो धृषि॒ता म॑रुत्वः । ति॒ग्मेष॑व॒ आयु॑धा सं॒शिशा᳚ना अ॒भि प्रय᳚न्तु॒ नरो᳚ अ॒ग्निरू᳚पाः ॥ 8 ॥

अ॒ग्निरि॑व मन्यो त्विषि॒त-स्स॑हस्व सेना॒नीर्नः॑ सहुरे हू॒त ए᳚धि । ह॒त्वाय॒ शत्रू॒न् वि भ॑जस्व॒ वेद॒ ओजो॒ मिमा᳚नो॒ विमृधो᳚ नुदस्व ॥ 9 ॥

सह॑स्व मन्यो अ॒भिमा᳚तिम॒स्मे रु॒ज-न्मृ॒ण-न्प्र॑मृ॒ण-न्प्रेहि॒ शत्रू᳚न् । उ॒ग्र-न्ते॒ पाजो᳚ न॒न्वा रु॑रुध्रे व॒शी वश᳚-न्नयस एकज॒ त्वम् ॥ 10 ॥

एको᳚ बहू॒नाम॑सि मन्यवीलि॒तो विशं᳚​विँशं-युँ॒धये॒ सं शि॑शाधि । अकृ॑त्तरु॒-क्त्वया᳚ यु॒जा व॒य-न्द्यु॒मन्त॒-ङ्घोषं᳚-विँज॒याय॑ कृण्महे ॥ 11 वि॒जे॒ष॒कृदिन्द्र॑ इवानवब्र॒वो॒(ओ)3॑-ऽस्माक᳚-म्मन्यो अधि॒पा भ॑वे॒ह 3 प्रि॒य-न्ते॒ नाम॑ सहुरे गृणीमसि वि॒द्मातमुत्सं॒-यँत॑ आब॒भूथ॑ ॥ 12 ॥

आभू᳚त्या सह॒जा व॑ज्र सायक॒ सहो᳚ बिभर्​ष्यभिभूत॒ उत्त॑रम् । क्रत्वा᳚ नो मन्यो स॒हमे॒द्ये᳚धि महाध॒नस्य॑ पुरुहूत सं॒सृजि॑ ॥ 13 ॥

संसृ॑ष्ट॒-न्धन॑मु॒भयं᳚ स॒माकृ॑तम॒स्मभ्य᳚-न्दत्तां॒-वँरु॑णश्च म॒न्युः । भिय॒-न्दधा᳚ना॒ हृद॑येषु॒ शत्र॑वः॒ परा᳚जितासो॒ अप॒ निल॑यन्ताम् ॥ 14 ॥

धन्व॑ना॒गाधन्व॑ ना॒जिञ्ज॑येम॒ धन्व॑ना ती॒व्रा-स्स॒मदो᳚ जयेम । धनु-श्शत्रो᳚रपका॒म-ङ्कृ॑णोति॒ धन्व॑ ना॒सर्वाः᳚ प्र॒दिशो᳚ जयेम ॥ ॐ शान्ता॑ पृथिवी शि॑वम॒न्तरिक्ष॒-न्द्यौर्नो᳚ दे॒व्य-ऽभ॑यन्नो अस्तु । शि॒वा॒ दिशः॑ प्र॒दिश॑ उ॒द्दिशो᳚ न॒-ऽआपो᳚ वि॒श्वतः॒ परि॑पान्तु स॒र्वत॒-श्शान्ति॒-श्शान्ति॒-श्शान्तिः॑ ॥